סרוק לתרומה

באדיבות עמותת סולם יהודה ללימוד קבלה חסידית בראשות הרב שקד אליהו פנחס שליט"א

תהילים קכא

א   שִׁיר לַמַּעֲלוֹת אֶשָּׂא עֵינַי אֶל-הֶהָרִים   מֵאַיִן יָבֹא עֶזְרִי. ב   עֶזְרִי מֵעִם יְהוָה   עֹשֵׂה שָׁמַיִם וָאָרֶץ. ג   אַל-יִתֵּן לַמּוֹט רַגְלֶךָ    אַל-יָנוּם שֹׁמְרֶךָ. ד   הִנֵּה לֹא-יָנוּם וְלֹא יִישָׁן   שׁוֹמֵר יִשְׂרָאֵל. ה   יְהוָה שֹׁמְרֶךָ    יְהוָה צִלְּךָ עַל-יַד יְמִינֶךָ. ו   יוֹמָם הַשֶּׁמֶשׁ לֹא-יַכֶּכָּה    וְיָרֵחַ בַּלָּיְלָה. ז   יְהוָה יִשְׁמָרְךָ מִכָּל-רָע    יִשְׁמֹר אֶת-נַפְשֶׁךָ. ח   יְהוָה יִשְׁמָר-צֵאתְךָ וּבוֹאֶךָ   מֵעַתָּה וְעַד-עוֹלָם.

תהילים קכב

א   שִׁיר הַמַּעֲלוֹת לְדָוִד שָׂמַחְתִּי בְּאֹמְרִים לִי   בֵּית יְהוָה נֵלֵךְ. ב   עֹמְדוֹת הָיוּ רַגְלֵינוּ   בִּשְׁעָרַיִךְ יְרוּשָׁלִָם. ג   יְרוּשָׁלִַם הַבְּנוּיָה   כְּעִיר שֶׁחֻבְּרָה-לָּהּ יַחְדָּו. ד   שֶׁשָּׁם עָלוּ שְׁבָטִים שִׁבְטֵי-יָהּ עֵדוּת לְיִשְׂרָאֵל    לְהֹדוֹת לְשֵׁם יְהוָה. ה   כִּי שָׁמָּה יָשְׁבוּ כִסְאוֹת לְמִשְׁפָּט    כִּסְאוֹת לְבֵית דָּוִד. ו   שַׁאֲלוּ שְׁלוֹם יְרוּשָׁלִָם    יִשְׁלָיוּ אֹהֲבָיִךְ. ז   יְהִי-שָׁלוֹם בְּחֵילֵךְ    שַׁלְוָה בְּאַרְמְנוֹתָיִךְ. ח   לְמַעַן אַחַי וְרֵעָי   אֲדַבְּרָה-נָּא שָׁלוֹם בָּךְ. ט   לְמַעַן בֵּית-יְהוָה אֱלֹהֵינוּ   אֲבַקְשָׁה טוֹב לָךְ.

תהילים קכג

א   שִׁיר הַמַּעֲלוֹת אֵלֶיךָ נָשָׂאתִי אֶת-עֵינַי   הַיֹּשְׁבִי בַּשָּׁמָיִם. ב   הִנֵּה כְעֵינֵי עֲבָדִים    אֶל-יַד אֲדוֹנֵיהֶם כְּעֵינֵי שִׁפְחָה    אֶל-יַד גְּבִרְתָּהּכֵּן עֵינֵינוּ אֶל-יְהוָה אֱלֹהֵינוּ   עַד שֶׁיְּחָנֵּנוּ. ג   חָנֵּנוּ יְהוָה חָנֵּנוּ    כִּי-רַב שָׂבַעְנוּ בוּז. ד   רַבַּת    שָׂבְעָה-לָּהּ נַפְשֵׁנוּהַלַּעַג הַשַּׁאֲנַנִּים    הַבּוּז לגאיונים (לִגְאֵי יוֹנִים).

תהילים קכד

א   שִׁיר הַמַּעֲלוֹת לְדָוִד לוּלֵי יְהוָה שֶׁהָיָה לָנוּ   יֹאמַר-נָא יִשְׂרָאֵל. ב   לוּלֵי יְהוָה שֶׁהָיָה לָנוּ   בְּקוּם עָלֵינוּ אָדָם. ג   אֲזַי חַיִּים בְּלָעוּנוּ   בַּחֲרוֹת אַפָּם בָּנוּ. ד   אֲזַי הַמַּיִם שְׁטָפוּנוּ   נַחְלָה עָבַר עַל-נַפְשֵׁנוּ. ה   אֲזַי עָבַר עַל-נַפְשֵׁנוּ   הַמַּיִם הַזֵּידוֹנִים. ו   בָּרוּךְ יְהוָה   שֶׁלֹּא נְתָנָנוּ טֶרֶף לְשִׁנֵּיהֶם. ז   נַפְשֵׁנוּ   כְּצִפּוֹר נִמְלְטָה מִפַּח יוֹקְשִׁיםהַפַּח נִשְׁבָּר    וַאֲנַחְנוּ נִמְלָטְנוּ. ח   עֶזְרֵנוּ בְּשֵׁם יְהוָה   עֹשֵׂה שָׁמַיִם וָאָרֶץ.

תהילים קכה

א   שִׁיר הַמַּעֲלוֹת הַבֹּטְחִים בַּיהוָה   כְּהַר-צִיּוֹן לֹא-יִמּוֹט לְעוֹלָם יֵשֵׁב. ב   יְרוּשָׁלִַם   הָרִים סָבִיב לָהּוַיהוָה סָבִיב לְעַמּוֹ   מֵעַתָּה וְעַד-עוֹלָם. ג   כִּי לֹא יָנוּחַ שֵׁבֶט הָרֶשַׁע   עַל גּוֹרַל הַצַּדִּיקִיםלְמַעַן לֹא-יִשְׁלְחוּ הַצַּדִּיקִים בְּעַוְלָתָה    יְדֵיהֶם. ד   הֵיטִיבָה יְהוָה לַטּוֹבִים    וְלִישָׁרִים בְּלִבּוֹתָם. ה   וְהַמַּטִּים עֲקַלְקַלּוֹתָם   יוֹלִיכֵם יְהוָה אֶת-פֹּעֲלֵי הָאָוֶןשָׁלוֹם    עַל-יִשְׂרָאֵל.

תהילים קכו

א   שִׁיר הַמַּעֲלוֹת בְּשׁוּב יְהוָה אֶת-שִׁיבַת צִיּוֹן   הָיִינוּ כְּחֹלְמִים. ב   אָז יִמָּלֵא שְׂחוֹק פִּינוּ   וּלְשׁוֹנֵנוּ רִנָּה אָז יֹאמְרוּ בַגּוֹיִם   הִגְדִּיל יְהוָה לַעֲשׂוֹת עִם-אֵלֶּה. ג   הִגְדִּיל יְהוָה לַעֲשׂוֹת עִמָּנוּ   הָיִינוּ שְׂמֵחִים. ד   שׁוּבָה יְהוָה אֶת-שבותנו (שְׁבִיתֵנוּ)   כַּאֲפִיקִים בַּנֶּגֶב. ה   הַזֹּרְעִים בְּדִמְעָה   בְּרִנָּה יִקְצֹרוּ. ו   הָלוֹךְ יֵלֵךְ וּבָכֹה   נֹשֵׂא מֶשֶׁךְ-הַזָּרַע בֹּא-יָבֹא בְרִנָּה   נֹשֵׂא אֲלֻמֹּתָיו.

תהילים קכז

א   שִׁיר הַמַּעֲלוֹת לִשְׁלֹמֹה אִם-יְהוָה לֹא-יִבְנֶה בַיִת   שָׁוְא עָמְלוּ בוֹנָיו בּוֹאִם-יְהוָה לֹא-יִשְׁמָר-עִיר    שָׁוְא שָׁקַד שׁוֹמֵר. ב   שָׁוְא לָכֶם מַשְׁכִּימֵי קוּם    מְאַחֲרֵי-שֶׁבֶת אֹכְלֵי    לֶחֶם הָעֲצָבִיםכֵּן יִתֵּן לִידִידוֹ    שֵׁנָא. ג   הִנֵּה נַחֲלַת יְהוָה בָּנִים    שָׂכָר פְּרִי הַבָּטֶן. ד   כְּחִצִּים בְּיַד-גִּבּוֹר   כֵּן בְּנֵי הַנְּעוּרִים. ה   אַשְׁרֵי הַגֶּבֶר   אֲשֶׁר מִלֵּא אֶת-אַשְׁפָּתוֹ מֵהֶםלֹא-יֵבֹשׁוּ   כִּי-יְדַבְּרוּ אֶת-אוֹיְבִים בַּשָּׁעַר.

תהילים קכח

א   שִׁיר הַמַּעֲלוֹת אַשְׁרֵי כָּל-יְרֵא יְהוָה   הַהֹלֵךְ בִּדְרָכָיו. ב   יְגִיעַ כַּפֶּיךָ כִּי תֹאכֵל    אַשְׁרֶיךָ וְטוֹב לָךְ. ג   אֶשְׁתְּךָ כְּגֶפֶן פֹּרִיָּה   בְּיַרְכְּתֵי בֵיתֶךָבָּנֶיךָ כִּשְׁתִלֵי זֵיתִים   סָבִיב לְשֻׁלְחָנֶךָ. ד   הִנֵּה כִי-כֵן יְבֹרַךְ גָּבֶר   יְרֵא יְהוָה. ה   יְבָרֶכְךָ יְהוָה מִצִּיּוֹן    וּרְאֵה בְּטוּב יְרוּשָׁלִָם כֹּל יְמֵי חַיֶּיךָ. ו   וּרְאֵה-בָנִים לְבָנֶיךָ    שָׁלוֹם עַל-יִשְׂרָאֵל.

תהילים קכט

א   שִׁיר הַמַּעֲלוֹת רַבַּת צְרָרוּנִי מִנְּעוּרַי   יֹאמַר-נָא יִשְׂרָאֵל. ב   רַבַּת צְרָרוּנִי מִנְּעוּרָי    גַּם לֹא-יָכְלוּ לִי. ג   עַל-גַּבִּי חָרְשׁוּ חֹרְשִׁים    הֶאֱרִיכוּ למענותם (לְמַעֲנִיתָם). ד   יְהוָה צַדִּיק    קִצֵּץ עֲבוֹת רְשָׁעִים. ה   יֵבֹשׁוּ וְיִסֹּגוּ אָחוֹר   כֹּל שֹׂנְאֵי צִיּוֹן. ו   יִהְיוּ כַּחֲצִיר גַּגּוֹת   שֶׁקַּדְמַת שָׁלַף יָבֵשׁ. ז   שֶׁלֹּא מִלֵּא כַפּוֹ קוֹצֵר    וְחִצְנוֹ מְעַמֵּר. ח   וְלֹא אָמְרוּ הָעֹבְרִים   בִּרְכַּת-יְהוָה אֲלֵיכֶםבֵּרַכְנוּ אֶתְכֶם    בְּשֵׁם יְהוָה.

תהילים קל

א   שִׁיר הַמַּעֲלוֹת מִמַּעֲמַקִּים קְרָאתִיךָ    יְהוָה. ב   אֲדֹנָי    שִׁמְעָה בְקוֹלִיתִּהְיֶינָה אָזְנֶיךָ קַשֻּׁבוֹת   לְקוֹל תַּחֲנוּנָי. ג   אִם-עֲו‍ֹנוֹת תִּשְׁמָר-יָהּ   אֲדֹנָי מִי יַעֲמֹד. ד   כִּי-עִמְּךָ הַסְּלִיחָה   לְמַעַן תִּוָּרֵא. ה   קִוִּיתִי יְהוָה קִוְּתָה נַפְשִׁי    וְלִדְבָרוֹ הוֹחָלְתִּי. ו   נַפְשִׁי לַאדֹנָי   מִשֹּׁמְרִים לַבֹּקֶר שֹׁמְרִים לַבֹּקֶר. ז   יַחֵל יִשְׂרָאֵל אֶל-יְהוָה    כִּי-עִם-יְהוָה הַחֶסֶד וְהַרְבֵּה עִמּוֹ פְדוּת. ח   וְהוּא יִפְדֶּה אֶת-יִשְׂרָאֵל   מִכֹּל עֲו‍ֹנֹתָיו.